Dawn tisei

L.Keivom

March 30-31, 2006 khan Delhi tlangah Bangladesh, China, India leh Myanmar (BCIM) ramte din Forum on Regional Cooperation inkhawm vawi rukna chhim turin, India ram aiawhin Aizawl atrangin thrianpa Zauva (Pu Lal Thanzaua Pudaite) a lo chhuk a. Prokram an zawh veleh kan in lamah ka hruai phei a, ni li dawn lai thawveng takin kan fianrial dun a, Mizoram tana sual buru, Delhi tana ‘THIL’ ni ve mai pawh hnianghnar takin kan kap zût a ni ber. Aizawl tlanga inkawm chu ni ila, ni lêng deuthawa thil sual tih emaw kan ni ang a, Delhi tehna fungah erawh kan thra nileng a ni zawk si. Ram khata cheng ve threuh threuh site khawvel leh nun ram hi danglam thei tak a lo ni.

Thrianpa Zauva nena kan inhmuh hi chuan ngaihtuahna vâk vel leh ram leh hnam tana kan hmathlir sawi dun bak chu thu dang a leng vak lo. Sawi tur a tam a, kan inhmuh apiang hian a hmawr kan phawrh tran dê dê emaw tih hian inthren leh a trùl a, a kham awm lo thrin hle. Tun trumah hi chuan, kan la tel vena ngai miah lo, Rally-ah te kan tel dun tlat mai! Hemi Rally hi Meitei helhoin Manipur Tipaimukh Biala kan nulate 21 an pawngsual leh kan mite chunga tawrawt an chhuah avanga Zofate lungawi lohna entir nana Hmar Students’ Association (HSA) ten Mizorama harhna a thlen vawi zana champha April 4, 2006 nia kawng zawh an huaihawt chu a ni. Zo hnahthlak aiawh zawng zawng lungrual takin Parliament Street-ah kawng kan zawh mup mup mai a. Keimahni bakah Naga unaute pawhin min rawn trawiawm a, keiniho ai mahin thu an sawi huai a, kan ri hut hut mai. Hei hi Delhi tlanga thil la awm ngai loh, Zoram khawvel tana chhinchhiah tlak, mel lung pawimawh tak a ni. A nghawng pawh a sei ang.

Ni dang aia tun truma thrianpa Zauva nena kan inhmuh ka lawm bik riau chhan chu, hun rei tawh tak atrang tawha lehkhabu buatsaih tura ka lo ngen thrin chu a ‘dummy copy’ a rawn ken vang a ni. A bu hmingah fuh takin DAWN TISEI a vuah a, a bu kawma lem chuang ka hmuh phat chuan, ‘Bei nge sei, Run dung’ tih trawngkauchheh hi ka rilruah a lo lang nghal a. A bu chhunga thusep hrang hrang 12 leh Thubelh 2 han chhiar hnu phei chuan, chhiar hmaa vaibêl dawn chen lek thlir phate pawhin an chhiar zawh hnu chuan an chenna khawvel ral lehlam thleng hawiin mit an lèn pha tawh dawn tih a chiang mai.

Hei hi DAWN TISEI ka riviuna a ni lo. Lehkhabu rilna, bulna, mawina, duhawmna leh chhenfakawmna chu a thu kenah a innghat a, sawi mawi avanga thra ta a ni lo a, sawi chhiat avanga chhe ta pawh a ni lo. Rangkachak leh dar rawng chu a inang hle a, ral atrang phei chuan hriat hran mai theih a ni lo. Belh chian a ngai a, bel chiangtu apiangin a danglamna an hre mai. Book of the Year kan hlan avanga dar kha rangkachaka chantir theih a ni lo. Kan hlan loh avangin rangkachak kha darah kan chantir theih bawk lo. Chîk taka chhiartuten a hlutzia an hre ber. Darthlalang them leh lunghlu them chu an inang hle mai thei. Mahse, an indanglamna hretute chuan lunghlu them leh darthlalang them hlutna inthlauhzia chu an hre mai. Hriatna lunghlu chhar duhte chuan DAWN TISEI hi chhiar ngei turin ka duhsak a ni. An chhiar hnu chuan Sukar khuaa Samari mite ang khan, keima sawi vang ni loin, a lehkhabu thu ken avang zawkin, testimawni ropui tak sawi tur an nei ngei ang.

Kum engemaw chhunga Mizoram atranga kan thu leh hla phuh chhuahte kan bih chian chuan, pawlitiks ramah chang ni lo, thu leh hla, abikin thu lamah mautam tràmpui kan tuar niin a lang a. Chu chuan thu leh hla a chhuak tlem ka tihna a ni lo. Chanchinbu leh lehkhabu thar a pung chho zèl a, mahse rilru le ngaituahna fah tak thu ziak chhiar tur a vang êm êm ka tihna a ni zawk. Chu chu keima hmuh dan a ni a, ka lungkham ruk pawh a ni bawk. Entir nan, Aizawl Post hi hmang ta ila. Thupui khelna ber chu phek thumna, Editorial awmna phek hi a ni a. Heta kan thu chai tam ber hi hnam fing zawkte tana thu tling lo, thu thring leh sawi tlak pawha an ngaih loh zu khap thu leh mahni aidentiti leh sakhuaa chiang lo, Israel hnam nihna trawmpui châka iak iak ho thukhawchang a ni ber a. Rinvang thu insawisiak nan a chang leh kan inbicharpui thul! 1966 bawr vela inbumpui ruai kan threh laia kan dinhmun bak kha mi tam takin kan la pel lo niin a lang. Kan pawlitisiante pawhin chumi thu penhleh leh pengtrawng tho mai chu a thluk danglam hretin an sa zui mai mai niin a lang. Tak ram hmachhawn ngam tak tak kan awm lo a, a hmachhawn dan tur pawh kan ngaihtuah duh hek lo. Hemi dinhmun hian ram zalenna leh hmasawnna min thlen lo ang. Thudik hmachhawn ngam mi huaisen kan mamawh a ni.

Thu leh hlaa mautam kan tawrh chhan tam tak zinga pakhat nia ka hriat chu sakhua zirtirna huanga kan ngaihtuahna khurkhung tlat kan tum vang leh chumi ramri kân chu kohhran dai nêr anga indahna a awm vang a ni. Chumi avang chuan, kan thu ziak tam zawk hi kohhran rip chhung atranga chhuak a ni a, a zalen lo a, bulna (originality) a tlachham a, a thring êm êm bawk. Mawl taka piantharna hi thuah khat chauh emawa ring tlut pawl kan awm a, chu chu kan vanduaina a ni. Piantharna kan tih hi Saptronga ‘realisation’ an tih hi a ni ber a, thuah tam a awm. Zofate kristianna khawvelah chuan, rinna avanga chhandam kan nih thu hriatna chauh hi piantharna awm chhun emawa ngai pawl kan awm a, chutah chuan awm hlen kan tum a, a piah ram, hriatna thar le mahni inhmuh chhuah thar zelna leilawn (stages of realization), Pathian ram nena inzawm chu kai chho zel tumna rilru pawh kan pu lo.

Chuvangin, stage 1-a chen hlen tumtu, a thring ringtute tan hriatna thar dawn ngaihna a awm lo. Chuvangin, kan Zoram khawvelah hian hriatna mau a tam reng mai a ni. Chumi khawvel piah rama cheng thrianpa Zauvan hringnun ram a thlir dan, hmuh dan leh ngaih dan chiang leh fiah tak maia a rawn phawrhna thute han chhiar hian kan thu leh hlaa ka riltramna leh tuihalna nasa takin min chhâwk a, ka thlarau dam sawng sawng hian ka hria a. Kan thu leh hla uai tawh hnu chhem harhtu thli fim a nih ngei ka beisei avangin ka lawm bawk a. A thu ziakah a cheng a, a thu buanah a chiang a, mi dang hmuh dan fiah takin min hrilh a, a tawpah a pawimawh ber, tu mitmei mah veng loin, ama hmuh dan leh ngaih dan huai takin min hrilh zêl a. Hei hi Isua duhzawng pawh a nih kha. A zirtirten mi ngaihdan an hrilh khan a lungawi mai lo; anni ngeiin an Rabbi an hmuh ve dan hriat a duh a ni. Peteran a chhang dik a, prawmawson sang ber a pe nghal mai a ni. Mi tam tak chun mi ngaihdan kan sawi kan sawi a, mahse mahni ngaihdan sawi tur kan nei ve lo a, kan nei ngam bawk hek lo. Lehkhabu hlu chu a ziaktuin a thil hmuh dan leh ngaih dan tlang tak leh chiang taka a tarlanna a ni zêl.

DAWN TISEI hi thu nunga khat a ni a, thawnthu chhiara chhiar chi a ni lo a, ngaihtuahna zau taka hawng a, zawi muanga chhiar a, thrial a, zir a, rilrua dawnkhawl a, taksa leh thlarau chawmna atana hman chi a ni. Phek 150 lek chhungah hian hringnun lamtluanga ram leh hnam leh mi mal damna tur damdawi a awm treuh a, chumi lama tuina nei apiangte chuan ngaihven tlak a ni. I chhiar zawh hunah i lehkhabu lei kha rangkakchak nge dâr, lunghlu nge darthlalang tih i hre mai ang. Thutak i hriat hunah chuan a zalentir ang che. Chumi hunah chuan, “I thu ni se” tih te, “Aizawl Syndrome’ tih te, Zotrong ziak dan tur hmangte leh thil dang tam tak awmzia i hre chiang tawh ang.